Chronik

1987 is es soweit,
zur BRAUTSCHAU werdn z'Ostern g'ladn die Leit.
Und weil ja a was bleibm soll für den Verein,
lassn ma ab sofort koan mehr ohne Eintritt z'zahln zur Tür hinein.
Damals is gspielt worn nu beim Wirt in Siegertshaft,
7 Aufführungen und 7 mal anders g'spielt habma da gschafft.

Ostern 1988 bring ma die Leit mit dem Stück ADAM UND EVA zum Lacha,
ois is begeistert, sogn so miaßt's ihr weita macha.
Für Silvester 1988 werdn zwoa kurze Stückln einstudiert,
Die ZUCHTSAU und wo da Mann mit dem DERRISCHEN EHEWEIB d'Nerven verliert.

Und weil net immer ois glatt gehn will,
hoast 1989 des Theatergspiel HEUT GEHT ALLES SCHIEF,
Zu Silvester 1989 sei zum Sagn,
habm die drei Einakter VERBOTENE LIEBESSPIELE, OANA MUASS HEIRATEN und DER DERRISCHE BAUER die Leit übern Jahresausklang umitragn.

Bevor mia zu Ostern 1990 kinna wieda spieln,
miaß ma uns erst um a neues Lokal mit oana Bühne bemühn.
Gott sei Dank sagt d'Menth Maria bei mir im Saal
kann die Theatergruppn spieln allemoi.
A AUFGELEGTER SCHWINDEL hat sich das Stück 1990 dann gnennt,
und im '91 Jahr
geht's dann um an GROSSVATERKILLER gar.

Frisch drauf los kinnan mia im Jahr 1992 wieda zwoa Stückln aufführn,
der GEHIRNSCHWUND und oan Einakter, wo drei durch die FÜHRERSCHEINPRÜUNG maschiern.
Unsa neues Domizil wird von de Leit guat aufgnumma und wann's a is kloan,
bei der Bühne sollt ma was toan.
Da Picker Reinhold setzt sich dran
und schaut was er aus der Bühne machn kann.
Bis Ostern 1993 is dann soweit,
unsa Bühne kann sich zoagn, mit dem HÖHRROHR in an neuen Kleid.

Im Jahr 1994 geht's weita,
da steht der THOMAS AUF DER HIMMELSLEITER.
1995 war vorerst unser letztes Stück,
wo da BRANDNER KASPER versucht mitn Borndlkrama sein Glück.

Mit da BRAUTSCHAU habma ma g'feiert unser Debü,
und darum führn ma 1997 auf des gleiche G'spü.
S'Jahr drauf 1998 spiel ma DREI MÄNNER UND EIN KIND,
da siehgt ma wia's bled hergehn kann mit aona Jungendsüd.

Im Jahr 1999 führn ma D'GICHTHAXN auf,
im neuen Jahrtausend 2000 dann DIE ANSTECKENDE G'SUNDHEIT drauf.
Nach soviel Krankheit wird's 2001 heiter,
da machma mit DEIN AUFTRITT TANTE FRIEDA weiter.

D'Menth Maria macht leida s'Wirtshaus zua,
doch mia gebm mitn Theaterspieln trotzdem koa Rua.
A neue Spielstättn is glei gfunden,
beim Enthammer im Saale drunten.
Da Martin Salzlechner nimmt sich da neuen Bühne an,
und Dank seinem Einsatz die Theatergruppm wieder spielen kann.
Mit eina neichn Bühne san mir 2002 zu Gange,
da wird a trotz VIEL ÄRGER FÜR DEN BÜRGERMEISTER niemanden bange.

Im Jahr drauf wird's ernst fia so manchn Bösewicht,
da geht's 2003 nämli vors HEITERE BEZIRKSGERICHT.
Dann braucht si a neamd mehr schrecka,
und wia 2004 bei LIEBE, GELD UND ALTPAPIER seine Geld verstecka.
2005 wird's bei uns dann ausairdisch wirkli wahr,
da kriagn ma BESUCH VOM BIERPLANET gar.

Nach vielen Jahrn g'hört d'Kirchn gricht, weil scho alles oba bricht.
Mia hobm uns g'sagt, da helfm ma gern,
und viel Leit wolltn dann z'Weihnachtn 2005 unser HIRTENSPIEL hörn.

Das ma am bestn glei d'Wahrheit sogt,
des hat sich 2006 beim SÜNDIGEN DORF wohl a jeda docht.
Und dass a fremde SILBERNE HAARNADEL im Bett nix guats verheißt,
des hat 2007 dann a glei jeder sofort gneißt.

Drum war's a a Fehler 2008,
dass der BAYERISCHE PROTECTULUS 2 Tag Urlaub hot g'mocht.
Was da dann alles is passiert, is oba Gott sei Dank schell wieda repariert.

Wia schnell ma zwegn sein Weiberl liagt,
wenn da Onke wia a BLITZ AUS HEITEREM HIMMEL um d'Eckn biagt,
des kann ma 2009 dann sehn.

2010 a neicha Wirt - doch es bleibt alles beim Alten,
da Dorfwirt wird die Theatergruppe a in Zukunft behaltn.

Nix Fetts mehr essn und g'sund lebn,
des muas 2010 DER KOHLRABIAPOSTEL durchlebn.
Ganz anders DIE 3 EISBÄREN auf da Alm,
de solln plötzli 2011 a kloans Kind dahoin.

Das ALLES IN ORDNUNG is, is fia den eingfleischtn Junggsell wichtig,
aber in Anbetracht der schenen Dirn 2012 dann nichtig.

A letzte Aufgab gibt's nu zu erfülln,
bevor der Polizist sehn derf des ewige Glühn.
Doch DA HIMME WART NET, drum geht er's 2013 gschwind an,
damit er dann an Himme nei kann.

Weil a VERKAUFTER GROSSVATER net richtig is,
wird's zruckhoin 2014 a richtigs Gschiss.
Und a wann ma sei Liabste moi beleidigt hat,
biagn ma 2015 's TÜPFERL AM i scho wieder grad.

Letztes Jahr 2016 war a KRACH UM JOLANTHE,
weil de Obrigkeit koa Gnade net kannte.
Z'Weihnachtn 2016 führn ma wieda a HIRTENSPIEL auf,
weil sonst fällt alln amoi de Kirchndeckn nauf.

Und 2017 gibt's an EHESTREIK der Weiba wia nu nia,
weil d'Monna wegen da Kellnerin liaba beim Wirt drinkn eana Bier.
Im Jahr 2018 wü da Papa fürs Dirndl nur an Akademiker als Mann,
 doch in WO GEHOBELT WIRD, DA FALLEN SPÄNE sagt eam sie wos Schöners an.

D'Monna gfrein sich 2019: ENDLICH SAN d'WEIBER FURT,
doch leider bleiben die Frauen zu ernan Leidwesen net lang genug durt.
Gemeinsam mitn Dorfklang und da Salz-Wei-Musi haben wir z'Weihnachten die Freid
und bringan a de Leut HEITERES UND BESINNLICHES ZUR WEIHNACHTSZEIT.

 Corona hat uns vom Spielen abgehalten die letzen 3 Jahr.
Man kann's gar net glauben, aber es is wahr.

 Nun is 2023 DER BEZAHLTE URLAUB die grandiose Idee von den Frauen,
hoffentlich werdens bei dene Urlaubsgäste net bled aus da Wäsche schaun.

2024 hat's dann für unsere Zuschauer einiges zum Schmunzeln gebm,
bei unserem Sketche-Abend mit Szenen aus dem alltäglichen Lebm,